डंपरच्या धडकेत “ओमनी”चा चक्काचूर ; आठ जण सुदैवानेच बचावले
कासारटाका गोड्याची वाडी येथील दुर्घटना ; अपघाताची पोलिसांत नोंद नाही
कुणाल मांजरेकर
मालवण : भरधाव वेगाने चिरे घेऊन जाणाऱ्या डंपरने समोरून येणाऱ्या मारुती ओमनी कारला जोरदार धडक दिल्याने झालेल्या अपघातात ओमनी कारचा चक्काचूर झाला आहे. यावेळी गाडीत चालकासह आठजण होते. सुदैवानेच या दुर्घटनेत कुणालाही गंभीर दुखापत झाली नाही. हे प्रकरण आपापसात मिटविण्यात आल्याने या अपघाताबाबत पोलीस ठाण्यात कोणतीही नोंद करण्यात आली नव्हती.
ही दुर्घटना शुक्रवारी दुपारी १२ वाजण्याच्या सुमारास घडली. मुंबई येथून सात जणांचा ग्रुप आंगणेवाडी यात्रेनिमित्त आला होता. मारुती ओमनी कार घेवून हे सर्वजण आंगणेवाडी यात्रेत मोड जत्रेसाठी निघाले होते. कासारटाका गोड्याचीवाडी परिसरात ही गाडी आली असता समोरून भरधाव वेगाने येणाऱ्या डंपरने गाडीला ड्रायव्हर साईडने जोरदार धडक दिली. या अपघातात कारच्या दर्शनी भागाचा चक्काचूर झाला. अपघातानंतर डंपर चालकाने येथे न थांबता पळ काढला. सुदैवानेच या दुर्घटनेत कुणालाही गंभीर दुखापत झाली नाही. अपघातानंतर डंपर चालकाच्या वतीने काहीजणांनी ओमनीच्या मालकाशी संपर्क साधून हे प्रकरण सामंजस्याने मिटविण्यासाठी पुढाकार घेतला. त्यामुळे याबाबत पोलिस ठाण्यात नोंद नव्हती.
