विनायक राऊत, २०२४ ला तुमचा बाजार उठणार !
“त्या” टीकेचा भाजपा नेते निलेश राणेनी घेतला समाचार
मालवण | कुणाल मांजरेकर
भाजपाचे युवा नेते निलेश राणे यांच्यावर टीका करणाऱ्या उद्धव ठाकरे गटाचे खासदार विनायक राऊत यांचा निलेश राणे यांनी समाचार घेतला आहे. विनायक राऊत तुम्ही मोदी लाटेमुळे दोनवेळा निवडून आलात. मी अपक्ष राहून सुद्धा २ लाख ७८ हजारहून अधिक मतं घेतली. आता ठाकरे पण भिकेला लागले आणि तुमचाही २०२४ ला बाजार उठणार अशी बोचरी टीका त्यांनी केली आहे.
खासदार विनायक राऊत यांनी एका खासगी कार्यक्रमात निलेश राणे यांच्यावर टीका केली होती. निलेश राणे सध्या विधानसभा निवडणुकीची तयारी करत आहेत. परंतु आपण त्यांना त्या निवडणुकीत देखील पराभूत करायचं आहे. निलेश राणे यांचं सध्या गुडघ्याला फेटा बांधून फिरणं सुरू आहे. म्हणे विधानसभेला लढणार आहेत. लोकसभेला त्यांना दोनदा आपटलं आहे. आता एकदा विधानसभेला आपटायचा पराक्रम करायचा आहे. असं विनायक राऊत यांनी म्हटलं होतं. त्याला त्याला उत्तर देताना निलेश राणे ट्विट करत ठाकरे गटाचे खासदार विनायक राऊत यांचा समाचार घेतला आहे.
