टेम्पो ट्रॅव्हलर झाडावर आदळली झाडावर ; दोघे प्रवासी जखमी
चालकाचा गाडीवरील ताबा सुटल्याने अपघात
वैभववाडी : वैभववाडी – एडगांव मार्गावर दरदिवशी अपघाताची मालिका सुरुच आहे. येथे चार दिवसांत चार अपघात घडले आहेत. शनिवारी पहाटे चालकाचा गाडीवरील ताबा सुटल्याने टेम्पो ट्रॅव्हलर झाडावर आदळली. एडगाव सर्व्हीसींग सेंटर नजीक हा अपघात घडला. या अपघातात दोन प्रवासी गंभीर जखमी झाले आहेत. या ट्रॅव्हल्स मधून एकूण १८ प्रवासी प्रवास करत होते. पोलीस व स्थानिक ग्रामस्थांनी जखमींना कणकवली येथील खाजगी रुग्णालयात उपचारासाठी हलविले आहे.
मुंबईहून गोव्याला हे सर्वजण टेंपो ट्रॅव्हलर (एमएच ४७ वाय २५२२) ने निघाले होते. करुळ घाट उतरून गाडी एडगाव येथे आली असता चालकाचा गाडीवरील ताबा सुटल्याने गाडी रस्त्यालगत असलेल्या झाडावर जोरदार आदळली. या अपघातात गाडीचे दर्शनी भागाचे मोठ्या प्रमाणावर नुकसान झाले आहे. या अपघातात शीतल चप्पा (वय ३६, रा. मुंबई) व प्रकाश मंधानिया (वय 33 रा. मुंबई) हे जखमी झाले आहेत. अपघाताची माहिती मिळताच पोलीस हवालदार नितीन खाडे, पो. ना. रमेश नारनवर, पोलीस कॉन्स्टेबल संदीप राठोड हे घटनास्थळी दाखल झाले. एडगांव येथील स्थानिक ग्रामस्थ हेमंत रावराणे, सचिन रावराणे, रवींद्र रावराणे, निलेश रावराणे, रोशन सुतार, बच्चाराम रावराणे यांनी पोलिसांना मदत केली. पोलिसांनी स्थानिक ग्रामस्थांच्या मदतीने जखमींना बाहेर काढत येथील ग्रामीण रुग्णालयात दाखल केले. पुढील उपचारासाठी त्या दोघांना कणकवली येथील खाजगी रुग्णालयात दाखल करण्यात आले आहे. माजी सरपंच राजेंद्र सुतार यांनी ट्रँव्हलर मधील इतर प्रवाशांना चहा व नाष्टयाची व्यवस्था केली. या अपघाताचा तपास वैभववाडी पोलिस करत आहेत.
चार दिवसांत चार अपघात
वैभववाडी ते एडगांव या मार्गावर अपघाताची मालिका सुरूच आहे. चार दिवसात चार अपघात घडले आहेत. एडगांव रामेश्वर मंदिर नजीक ट्रक पलटी होऊन अपघात झाला होता. तसेच घाडीवाडीनजीक मनीष ट्रॅव्हल्सला भीषण आग लागून बस जळून खाक झाली होती. शुक्रवारी एडगांव पुलावरून कार सुखनदी पात्रात कोसळली. सुदैवाने या चारही अपघातात जीवितहानी टळली आहे.
