मालवणात ६ जूनला सादर होणार “सह्याद्रीचा सिंह… राजा शिवछत्रपती” महानाट्य

शिवराज्याभिषेक दिनाच्या ३५० व्या सांगता दिनाच्या निमित्ताने मालवण मधील शिवप्रेमी मित्रमंडळाची निर्मिती

मालवण | कुणाल मांजरेकर

शिवराज्याभिषेकाच्या ३५० वर्षांच्या सांगता दिनाच्या निमित्ताने मालवण मधील शिवप्रेमी मित्रमंडळाने शिवरायांच्या चरित्रावर आधारित “सह्याद्रीचा सिंह… राजा शिवछत्रपती” या महानाट्याची निर्मिती केली आहे. तब्बल १२० स्थानिक कलाकारांचा सहभाग असलेले हे महानाट्य ६ जून रोजी रात्री ८.३० वाजता मालवण नगरपालिकेच्या मामा वरेरकर नाट्यगृहात सादर होणार आहे, अशी माहिती या महानाट्याचे निर्माते भाऊ सामंत यांनी पत्रकार परिषदेत दिली. 

मालवण भरड येथील हॉटेल ओऍसिस मध्ये आयोजित पत्रकार परिषदेत त्यांनी ही माहिती दिली. यावेळी गणेश मेस्त्री, समीर शिंदे, सुभाष कुमठेकर, श्रीराज बादेकर आदी उपस्थित होते. यावेळी भाऊ सामंत म्हणाले, या नाट्याची संकल्पना व निर्मिती आपली असून हा विचार मालवण मधील नाट्यप्रेमी नागरिकांसमोर मांडल्यावर त्यास हळूहळू प्रतिसाद मिळत जाऊन अनेक स्थानिक कलाकार यास जोडले गेले. पुणे येथील लेखक मोहन शेटे हे या महानाट्याचे  आहेत. २०११ मध्ये घुमडे येथील श्री घुमडाई देवीच्या वार्षिक उत्सवावेळी सादरीकरणासाठी मोहन शेटे यांच्याकडून आपण हे नाटक लिहून घेतले होते. त्यावेळी प्रथम घुमडे येथे हे नाटक सादर झाले होते. आता अनेक वर्षांनी शिवराज्याभिषेक दिना निमित्त या नाटकाची पुन्हा निर्मिती आम्ही केली आहे. मालवण हे छत्रपती शिवाजी महाराज यांच्या पदस्पर्शाने पावन झालेले आहे, येथे शिवरायांनी सिंधुदुर्ग किल्ला उभारला, हाच किल्ला आता मालवणच्या पर्यटनाचा केंद्रबिंदू आहे. मालवणवर शिवरायांचे मोठे उपकार आहेत. शिवरायांमुळेच आज हिंदू धर्म टिकला आहे. त्यांच्या या सर्व उपकारातून उतराई होण्याचा व शिवरायांना मानवंदना देण्याचा एक छोटासा प्रयत्न आम्ही या नाटकाच्या सादरीकरणातून करणार आहोत, असे भाऊ सामंत म्हणाले. 

या महानाट्याचे दिग्दर्शन गणेश मेस्त्री करीत आहेत. तर प्रकाश योजना – शरद कांबळी, नेपथ्य – श्रीराज बादेकर, पार्थ मेस्त्री, संतोष मेस्त्री, सूत्रधार – समीर शिंदे, रंगभूषा व वेशभूषा तारक कांबळी, रंगमंच व्यवस्थापक सुभाष कुमठेकर हे सांभाळत आहेत. या नाट्यात छत्रपतींच्या जीवनातील महत्वाचे प्रसंग समाविष्ट आहेत. मोरयाचा धोंडा याठिकाणी किल्ले सिंधुदुर्गचे झालेले भूमिपूजन, किल्ले सिंधुदुर्ग बांधणी आणि महाराजांची भेट, कोळी समाजातर्फे महाराजांचे झालेले उत्स्फूर्त स्वागत यांचा समावेश आहे. महाराष्ट्राच्या संस्कृतीवर आधारित १६ नृत्यांचा यात समावेश आहे, गोंधळी नृत्य, शेतकरी नृत्य, धनगरी नृत्य, कोळी नृत्य, जोगवा नृत्य, अनेक पोवाडे यांचा समावेश आहे. वय वर्षे दहा ते ७८ वर्षांपर्यंतच्या कलाकारांचा यामध्ये समावेश आहे. गेली दोन ते अडीच महिने या महानाट्यासाठी परिश्रम घेतले गेले. यामध्ये मालवण शहरासह आंगणेवाडी, घुमडे, गवंडीवाडा, तारकर्ली, देवबाग, कुडाळ, परुळे, सावंतवाडी या ठिकाणच्या एकूण १२० कलाकारांचा समावेश आहे, असेही भाऊ सामंत म्हणाले. 

या नाट्यासाठी उद्योजक दत्ता सामंत, पालकमंत्री रवींद्र चव्हाण यांचे सहकार्य लाभले आहे. तसेच नाट्य सराव व सादरीकरणासाठी मामा वरेरकर नाट्यगृह उपलब्ध करून देऊन मालवण नगरपालिकेचे मुख्याधिकारी संतोष जिरगे यांनीही सहकार्य केले आहे. यात सहभागी कलाकारांना कसलेही मानधन दिले जाणार नाही. तसेच महानाट्य सर्वांसाठी खुले आहे. महानाट्याच्या सादरीकरणावेळी स्वागताध्यक्ष म्हणून मुख्याधिकारी संतोष जिरगे, उदघाटक म्हणून भाजपचे प्रदेश उपाध्यक्ष व जिल्हा बॅंक उपाध्यक्ष अतुल काळसेकर, प्रमुख पाहुणे म्हणून भाजपचे जिल्हाध्यक्ष प्रभाकर सावंत, लेखक मोहन शेटे आदी उपस्थित राहणार आहेत, असेही भाऊ सामंत यांनी सांगितले.