मालवण पं. स. च्या “पंचायत समिती आपल्या दारी” उपक्रमाचा नांदोस मध्ये शुभारंभ
अभिनव उपक्रमांसाठी मालवण पं. स. नेहमीच अग्रेसर : वित्त आणि बांधकाम सभापतींकडून कौतुक
कुणाल मांजरेकर
मालवण : मालवण पंचायत समितीच्या ‘पंचायत समिती आपल्या दारी’ या उपक्रमाचा शुभारंभ मंगळवारी नांदोस ग्रामपंचायत येथून करण्यात आला. अभिनव उपक्रम राबविण्यात आणि ते यशस्वी करून दाखवण्यात मालवण पंचायत समिती नेहमीच अग्रेसर राहिल्याचे सांगून वित्त आणि बांधकाम सभापती महेंद्र चव्हाण यांनी कौतुक केले.
नांदोस ग्रामपंचायत सभागृह येथे नांदोस, तिरवडे, सुकळवाड ग्रामपंचायत क्षेत्र अंतर्गत येणाऱ्या विकास कामांचा यावेळी आढावा घेण्यात आला. ज्यात रखडलेली कामे, जनतेच्या समस्या जाणून घेताना तालुकास्तरीय अधिकारी वर्गाच्या उपस्थितीत प्रश्न, समस्या तात्काळ सोडवणे तसेच योग्य ती कार्यवाही करणेबाबत विविध विषयांवर चर्चा करण्यात आली. तर दुपारी हेदुळ, खोटले, वायंगवडे या गावात पंचायत समिती आपल्या दारी अभियान पोहचले.
मालवण पंचायत समिती सभापती अजिंक्य पाताडे, उपसभापती राजू परुळेकर यांच्या संकल्पनेतील या अभिनव उपक्रमाचे उद्घाटन जिल्हापरिषद वित्त व बांधकाम सभापती महेंद्र चव्हाण यांच्या प्रमुख उपस्थितीत करण्यात आले. यावेळी जि. प. सदस्या माधुरी बांदेकर, पंचायत समिती सदस्या मनीषा वराडकर, गटविकास अधिकारी जयेंद्र जाधव, सरपंच, उपसरपंच, सदस्य आणि तालुकास्तरीय अधिकारी, सर्व खातेप्रमुख उपस्थित होते. एकाच छताखाली अधिकारी वर्गाच्या उपस्थितीत विकास कामांचा आढावा घेत समस्या जाणून घेत तात्काळ सुटणाऱ्या समस्या संबंधित अधिकारी वर्गाच्या माध्यमातून सोडवण्यात आल्या. ज्या उद्देशाने हा उपक्रम हाती घेतला त्याला शुभारंभाला मिळालेल्या चांगल्या प्रतिसादाबाबत सभापती पाताडे, उपसभापती परुळेकर यांनी समाधान व्यक्त केले. तालुक्यातील सर्व गावात हा उपक्रम राबवला जाणार असल्याचे सभापती अजिंक्य पाताडे म्हणाले.
मालवण पंचायत समिती मेहमीच अभिनव उपक्रम राबवण्यासाठी व ते यशस्वी करण्यात अग्रेसर आहे. त्याच धर्तीवर ग्राम विकासाच्या व जनतेच्या प्रश्नांच्या सोडवणुकीसाठी राबवण्यात येणारा पंचायत समिती आपल्या दारी हा उपक्रमही यशस्वी ठरेल. असा विश्वास जि. प. चे वित्त व बांधकाम सभापती महेंद्र चव्हाण यांनी व्यक्त केला.
