भाजपा महाराष्ट्र प्रदेश ‘मिडिया वॉररूम’ प्रमुखपदी अविनाश पराडकर
प्रदेशाध्यक्ष चंद्रशेखर बावनकुळे यांनी केली घोषणा
मालवण : भारतीय जनता पार्टी महाराष्ट्र प्रदेशच्या सोशल मिडिया आणि मीडिया मॅनेजमेंट वॉररूमच्या प्रमुखपदी अविनाश पराडकर यांची नियुक्ती करण्यात आली आहे. भाजपा प्रदेशाध्यक्ष चंद्रशेखर बावनकुळे यांनी महाराष्ट्र प्रदेश कार्यालयातुन ही नियुक्ती जाहीर केली आहे.
मीडिया वॉररूम ही भारतीय जनता पक्षाची महत्वाकांक्षी योजना असून त्यावर भाजपाची केंद्रीय व प्रदेश यंत्रणा समन्वय राखून एकत्रित काम करत आहे. संपुर्ण महाराष्ट्रात सोशल मीडिया यंत्रणा भक्कम करण्यात येत आहे. या वॉररूमवर अविनाश पराडकर यांची झालेली नियुक्ती सिंधुदुर्ग जिल्ह्यासाठी अभिमानास्पद असून भाजपा कार्यकर्त्यांनी व सिंधुदुर्ग सोशल मीडिया टीमने त्याचा आनंद व्यक्त केला आहे. चांगल्या कामाची दखल भाजपात निश्चितच घेतली जाते हे यातून दिसून आले, असे मत सिंधुदुर्ग सोशल मिडिया जिल्हा संयोजक समीर प्रभुगावकर यांनी व्यक्त केले आहे.
अविनाश पराडकर यांनी यापूर्वी सिंधुदुर्ग जिल्हा संयोजक म्हणून जबाबदारी यशस्वीपणे पार पाडली होती. त्यानंतर रत्नागिरी-सिंधुदुर्ग लोकसभा मतदारसंघासाठी संयोजक म्हणून त्यांची नियुक्ती करण्यात आली होती. नुकताच प्रदेशाध्यक्ष चंद्रशेखर बावनकुळे यांचा सिंधुदुर्ग जिल्हा दौरा झाला त्यावेळी त्यांनी सोशल मीडियाच्या बैठकीत पराडकर यांच्यावर प्रदेशाची महत्वाची जबाबदारी देण्यात येणार असल्याचे सूतोवाच केले होते. त्यानुसार काल त्यांनी अविनाश पराडकर यांच्या वॉररूम प्रमुखपदाच्या नियुक्तीची घोषणा केली आहे.
