नगरसेवकाचा आदर्श ; स्वखर्चातून झाडे व ग्रास कटाई
नगरसेवक यतीन खोत यांचं सर्वत्र होतंय कौतुक
मालवण : कोरोना प्रादुर्भावामुळे मालवण शहरात स्वच्छता कर्मचारी अपुरे पडत आहेत. अशा परिस्थितीतही नगराध्यक्ष महेश कांदळगावकर आणि त्यांचे सहकारी शहरात स्वच्छता सेवा देण्याचा प्रयत्न करीत आहेत. मात्र त्यांच्यावरही मर्यादा येत असल्याने ऐन गणेशोत्सव तोंडावर आला असताना शहरात वाढलेली झाडी नागरिकांसाठी त्रासदायक ठरत आहे. यावर उपाय म्हणून माजी बांधकाम सभापती, नगरसेवक यतीन खोत यांनी आपल्या प्रभागात स्वखर्चातून झाडे आणि ग्रास कटाईची मोहीम हाती घेतली आहे. पालिकेवर अवलंबून न राहता अथवा कुणावरही आरोप- प्रत्यारोप न करता नगरसेवक यतीन खोत नागरिकांच्या सेवेसाठी घेतलेल्या या पुढाकाराचे सर्वत्र कौतुक होत आहे.
मालवण नगरपालिकेच्या माध्यमातून शहरातील नागरिकांना विविध सेवा दिल्या जातात. मात्र स्वच्छता विभागात कोरोना प्रादुर्भावमुळे स्वच्छता कर्मचारी उपलब्ध करताना अडचणी निर्माण होत आहेत. तरीही नगराध्यक्ष महेश कांदळगावकर व सहकारी नगरसेवक यांच्या माध्यमातून योग्य नियोजन करून प्रत्येक समस्येवर मार्ग काढत नागरिकांना सेवा देण्याचा सर्वोत्तम प्रयत्न सुरू आहे. वादळानंतर बहुतांश सर्व ठिकाणी खंडित झालेली स्ट्रीट लाईट सेवा पूर्ववत केली जात आहे. बहुतांश ठिकाणी नवे लाईट बसवण्यात आले आहे. राहिलेले कामही लवकर पूर्ण केले जाणार आहे. त्याबरोबर आगामी गणेशोत्सव लक्षात रस्त्याच्या दुतर्फा वाढलेली झाडी व गवत तोडण्याची मागणी शहरात सर्वच भागातून होत आहे. काही ठिकाणी कामही सुरू झाले आहे. मात्र मोठ्या प्रमाणात वाढलेली झाडी लक्षात घेता कामाची व्यापकता मोठी आहे. या सर्व गोष्टींचा विचार करता पालिका सहकार्य करण्याच्या उद्देशाने माझ्या तीन नंबर प्रभागात रस्त्याच्या दुतर्फा वाढलेली झाडी व गवत स्वखर्चाने तोडून घेण्याचा निर्णय घेण्यात आला. त्यानुसार मंगळवार पासून कामही सुरू झाले आहे. पालिका स्वच्छता विभागाकडून काम होईलच. मात्र लवकर काम पूर्ण व्हावे या उद्देशाने तसेच लोकप्रतिनिधी म्हणून जनतेप्रति असलेल्या कर्तव्य भावनेतून हा उपक्रम राबवला जात आहे. नगराध्यक्ष यांच्याशी चर्चा करून प्रभागात काम सुरू करण्यात आले आहे. असे नगरसेवक यतीन खोत यांनी म्हटले आहे.
