मनसेच्या मालवण शहरअध्यक्षपदी सागर जाधव
देवबाग जि. प. उपतालुकाध्यक्ष पदी गजानन बोडवे यांची नियुक्ती ; अन्य पदाधिकाऱ्यांच्याही नियुक्त्या जिल्हाध्यक्ष धीरज परब यांनी केल्या जाहीर
मालवण | कुणाल मांजरेकर
महाराष्ट्र नवनिर्माण सेना कुडाळ मालवण विधानसभेची बैठक कुडाळ येथे आयोजित करण्यात आली होती. या बैठकीत मनसे अध्यक्ष राज ठाकरे यांच्या आदेशानुसार पक्षाचे नेते शिरीष सावंत, पक्ष निरीक्षक तथा सरचिटणीस संदिप दळवी व कामगार सेनेचे सरचिटणीस गजानन राणे यांच्या सुचनेनुसार मालवण तालुक्यातील नवीन पदाधिकारी नियुक्त्या जाहीर करण्यात आल्या आहेत. यामध्ये मालवण शहराध्यक्ष पदी सागर जाधव यांची नियुक्ती करण्यात आली आहे.
त्याचप्रमाणे देवबाग जि. प. उपतालुकाध्यक्षपदी गजानन बोडवे, सुकळवाड पं. स. विभाग अध्यक्षपदी रोहन ठाकुर, उपविभाग अध्यक्षपदी संतोष सावंत, शाखाध्यक्ष सुकळवाड अर्जुन अटक तसेच शाखाध्यक्ष हेदुळ सुरज पुजारे यांची निवड करण्यात आली. यावेळी जिल्हाध्यक्ष धीरज परब, उपजिल्हाध्यक्ष गणेश वाईरकर, उपजिल्हाध्यक्ष कुणाल किनळेकर, विधानसभा सचिव सचिन सावंत, तालुकाध्यक्ष हेमंत जाधव आदी पदाधिकारी उपस्थित होते. यावेळी संघटनात्मक विचार उपस्थितांनी मांडले. तसेच नवनियुक्त पदाधिकाऱ्यांना पुढील वाटचालीस शुभेच्छा देण्यात आल्या.
