भाजपात संघटनात्मक नियुक्त्या : शहर व ग्रामीण मंडल प्रभारींची नियुक्ती
मालवण ग्रामीण मंडल अध्यक्षपदी आप्पा लुडबे तर शहर मंडल अध्यक्षपदी संतोष गावकर यांची नियुक्ती
मालवण | कुणाल मांजरेकर
भारतीय जनता पार्टीच्या वतीने शहर आणि ग्रामीण मंडल मध्ये प्रभारींच्या नियुक्त्या भाजपा जिल्हाध्यक्ष प्रभाकर सावंत यांनी जाहीर केल्या आहेत. यामध्ये मालवण ग्रामीण मंडल अध्यक्षपदी माजी नगरसेवक परशुराम उर्फ आप्पा लुडबे यांची तर मालवण शहर मंडल अध्यक्षपदी चिंदर येथील संतोष गावकर यांची नियुक्ती करण्यात आली आहे.
आप्पा लुडबे हे राष्ट्रीय स्वयंसेवक संघ आणि अखिल भारतीय विद्यार्थी परिषदेच्या मुशीत तयार झालेले नेतृत्व असून अभाविपचे जिल्हाध्यक्ष आणि महाराष्ट्र प्रदेश सचिव म्हणून त्यांनी काम पाहिले आहे. तर मालवण नगर परिषदेत अभ्यासू नगरसेवक, आरोग्य सभापती म्हणून देखील त्यांनी यशस्वी काम केले आहे. त्यांच्यावर मालवण ग्रामीण मंडल प्रभारी पदाची जबाबदारी देण्यात आली आहे. तर चिंदर येथील संतोष गावकर यांची मालवण शहर प्रभारी म्हणुन नियुक्ती करण्यात आली आहे. संतोष गावकर यांनी यापूर्वी भाजपा तालुका उपाध्यक्ष, आचरा जिल्हा परिषद प्रभारी, आचरा ग्रामपंचायत निवडणुक प्रभारी अशी अनेक पदे भूषविली असून वैभवशाली रामेश्वर पतसंस्था आचरा याठिकाणी संचालक म्हणूनही ते काम पहात आहेत. या नियुक्ती बद्दल या दोघांचे अभिनंदन होत आहे. या नियुक्त्या भाजपचे कुडाळ मालवण विधानसभा प्रमुख निलेश राणे यांच्या सूचनेनुसार जिल्हाध्यक्ष प्रभाकर सावंत यांनी जाहीर केली आहे.
