घुमडाई मंदिरात श्रावणधारा व निमंत्रित भजनी मंडळांची जिल्हास्तरीय भजन स्पर्धा
श्रावण मासा निमित्ताने उद्योजक दत्ता सामंत पुरस्कृत व घुमडे ग्रामस्थ मंडळाच्यावतीने आयोजन ; संयुक्त दशावताराचेही होणार सादरीकरण
मालवण : श्रावण मास निमित्ताने श्री देवी घुमडाई मंदिर घुमडे येथे उद्योजक दत्ता सामंत पुरस्कृत व घुमडे ग्रामस्थ मंडळ आयोजित गुरुवर्य कै. पंढरीनाथ घाडीगांवकर स्मरणार्थ निमंत्रित भजनी मंडळांची जिल्हास्तरीय भजन स्पर्धा ८ ते ११ सप्टेंबर तसेच श्रावण महिन्यातील प्रत्येक मंगळवारी श्रावणधारा या धार्मिक व सांस्कृतिक कार्यक्रमांचे आयोजन करण्यात आले आहे. स्पर्धा कार्यक्रमांचे हे नववे वर्ष आहे.
श्रावण मंगळवार निमित श्रावणधारा कार्यक्रमाचे आयोजन २२ ऑगस्ट रोजी सकाळी घुमडाई मंदिर येथे धार्मिक कार्यक्रम लघुरुद्र, दुपारी महाप्रसाद, सायंकाळी ७ वाजता सिंधुदुर्ग जिल्ह्यातील नामवंत दशावतारी कलाकार यांचा महान पौराणिक संयुक्त दशावतार मयुरध्वज ताम्रध्वज सादर होणार आहे. २९ ऑगस्ट रोजी सकाळी मंदिरात धार्मिक कार्यक्रम लघुरुद्र, दुपारी महाप्रसाद, सायंकाळी पारंपरिक सांस्कृतिक कार्यक्रम, ५ सप्टेंबर रोजी सकाळी मंदिरात धार्मिक लघुरुद्र, दुपारी महाप्रसाद, सायंकाळी सांस्कृतिक कार्यक्रम होणार आहे.
जिल्हास्तरीय भजन स्पर्धा
उद्योजक दत्ता सामंत पुरस्कृत व घुमडे ग्रामस्थ मंडळ आयोजित गुरुवर्य कै. पंढरीनाथ घाडीगांवकर स्मरणार्थ निमंत्रित भजनी मंडळांची जिल्हास्तरीय भजन स्पर्धा ८ ते ११ सप्टेंबर या कालावधीत सायंकाळी घुमडाई मंदिर येथे आयोजित करण्यात आली आहे. स्पर्धेतील विजेत्या मंडळास ११,१११ व सन्मान चिन्ह, प्रशस्तीपत्र, द्वितीय क्रमांक ७,७७७ सन्मानचिन्ह, प्रशस्तीपत्र, तृतीय क्रमांक ५,५५५ सन्मान चिन्ह, प्रशस्तीपत्र उत्तेजनार्थ प्रथम ३,३३३ सन्मान चिन्ह, प्रशस्तीपत्र, उत्तेजनार्थ द्वितीय २,२२२ सन्मान चिन्ह, प्रशस्तीपत्र कै. रत्नाकर हरी बिरमोळे समारणार्थ वैयक्तिक पारितोषिके उत्कृष्ट कोरस, तालरक्षक, उत्कृष्ट गायक यांना प्रत्येकी १,१११ व सन्मान चिन्ह, प्रशस्तीपत्र देण्यात येणार आहे. स्पर्धेची सर्व बक्षिसे उद्योजक दत्ता सामंत यांच्या वतीने पुरस्कृत करण्यात आली आहेत.
पारितोषिके वितरण व संयुक्त दशावतार
मंगळवार १२ सप्टेंबर रोजी मंदिरात धार्मिक कार्यक्रम लघुरुद्र, दुपारी महाप्रसाद, सायंकाळी ५ वाजता भजन स्पर्धा पारितोषिक सोहळा, सायंकाळी।७ वाजता सिंधुदुर्ग जिल्ह्यातील नामवंत दशावतार कलाकार यांचा संयुक्त दशावतार राजा रुक्मांगत सादर होणार आहे. तरी या कार्यक्रमाचा लाभ घ्यावा असे आवाहन घुमडे ग्रामस्थ मंडळ अध्यक्ष दत्ता सामंत, सचिव भाऊ सामंत व सर्व सहकारी यांच्या वतीने करण्यात आले आहे.
