स्वदेश दर्शन योजनेच्या माध्यमातून जिल्ह्याच्या पर्यटन वाढीसाठी प्रशासन प्रयत्नशील 

पर्यटन मंत्रालयाचे प्रकल्प समन्वयक मंदार हाडके यांचे प्रतिपादन ; मामा वरेरकर नाट्यगृहात पर्यटन व्यवसायिकांची कार्यशाळा संपन्न

मालवण : सिंधुदुर्ग हा पर्यटन जिल्हा असून केंद्रीय पर्यटन मंत्रालयाच्या माध्यमातून महाराष्ट्र राज्यात सिंधुदुर्ग हा एकमेव जिल्हा केंद्रीय स्वदेश दर्शन पर्यटन योजनेत समाविष्ट करण्यात आला आहे. या माध्यमातून सिंधुदुर्ग जिल्ह्यातील शाश्वत पर्यटन विकासासाठी कार्य होणार असून स्थानिक पर्यटन व्यावसायिकांच्या समन्वयातून येथे काम केले जाणार असल्याचे प्रतिपादन पर्यटन मंत्रालयाचे प्रकल्प समन्वयक मंदार यांचे यांनी येथे बोलताना केले.

केंद्र सरकारने भारतातील पर्यटन क्षेत्रात वाढ होण्यासाठी देशातील ५८ जिल्ह्याची निवड केली असून यामध्ये महाराष्ट्र राज्यातील एकमेव सिंधुदुर्ग जिल्ह्याचा समावेश आहे. सदर योजना स्वदेश 2.0 या नावाने कार्यान्वित करण्यात आली असून जिल्ह्यातील शाश्वत पर्यटनासाठी केंद्र सरकार व राज्य सरकारच्याच्या माध्यमातून नियोजनबद्ध सुरुवात झाली आहे. या नुसार जिल्ह्यातील पर्यटन क्षेत्रातील हॉटेल,होम स्टे,ऍग्रो टुरिझम,रीसॉर्ट क्षेत्रातील पर्यटन व्यावसायिकांना त्यांच्या व्यवसाय वाढीसाठी, निधी पोर्टल रजिस्टर माहितीसाठी येथील मामा वरेरकर नाट्यगृहात पर्यटन व्यावसायिकांची कार्यशाळा गुरुवारी आयोजित करण्यात आली. यासाठी उपस्थित मंदार हाडके यांचा पर्यटन व्यावसायिक महासंघाचे मालवण शहर अध्यक्ष मंगेश जावकर यांच्या हस्ते सत्कार करण्यात आला. यावेळी मंदार हाडके यांनी निधी पोर्टलवर पर्यटन व्यावसायिकांनी कश्या पद्धतीने नोंदणी करावी यांचे मार्गदर्शन केले. तसेच न्याहारी निवास सर्वेक्षण तसेच कौशल्य विकासासाठी प्रशिक्षण कार्यक्रम जिल्ह्यातील तालूका स्तरावरील गावागावात राबविण्यात येणार असल्याचे त्यांनी सांगितले. यावेळी स्वदेश दर्शन समिती सदस्य तसेच पर्यटन व्यवसायिक महासंघ अध्यक्ष विष्णू मोंडकर म्हणाले, जिल्ह्यातील पर्यटन व्यवसाय स्थानिकांनी कुठल्याही शासकीय मदतीशिवाय स्वकर्तृत्वावर उभा केला असून ह्या भागात आज जिल्ह्यात पर्यटन व्यवसाय बहरतं आहे. जिल्ह्यातील शाश्वत पर्यटन विकासासाठी स्वदेश दर्शन योजनेच्या माध्यमातून सागरी पर्यटना बरोबर कृषी, मेडिकल, हिस्ट्री जंगल टुरिझम क्षेत्रात काम काम होणार असून स्थानिक पर्यटन व्यावसायिक आणि प्रशासन यामध्ये समन्वय साधणे पर्यटन स्थळांवर आवश्यक सुविधा निर्माण करणेसाठी प्रयत्न केला जाणार आहे, असे ते म्हणाले. जिल्ह्यातील व्यावसायिकांनी यामध्ये सहभाग घेतला यावेळी पर्यटन व्यावसायिक महासंघ सल्लागार गुरु राणे यांनी उपस्थितांना मार्गदर्शन केले. यावेळी कार्यक्रमासाठी जागा उपलध करून दिल्या बद्दल मालवण नगरपालिकेचे आभार मानण्यात आले यावेळी मिलिंद झाड, किशोर दाभोलकर, प्रफुल मांजरेकर, सुनील देसाई, दादा वेंगुर्लेकर आदी पर्यटन व्यावसायिक उपस्थित होते.