मालवण- चुनवरे येथे युवतीची आत्महत्या
मालवण : तालुक्यातील चुनवरे येथील पूनम रायबा सावंत (वय-२१) या युवतीने राहत्या घरात गळफास लावून आत्महत्या केल्याची घटना रविवारी सायंकाळी घडली. या प्रकरणी येथील पोलीस ठाण्यात आकस्मिक मृत्यू म्हणून नोंद करण्यात आली आहे.
पोलिसांनी दिलेल्या माहितीनुसार रविवारी सायंकाळी घरात कोणीही नसताना पूनम हिने घरातील हॉल मधील लाकडी वाशाला ओढणीच्या साहाय्याने गळफास घेतला. लाकडे गोळा करण्यास गेलेली आई घरी परतली असता पूनम दरवाजा उघडत नसल्याने खिडकीतून पाहिल्यावर ती लटकलेल्या स्थितीत दिसून आली. शेजारच्यांच्या मदतीने धक्के मारून दरवाजा उघडत घरात प्रवेश केल्यानंतर पूनम हिला खाली काढून रुग्णालयात नेण्यात आले. मात्र, डॉक्टरांनी तिला मृत घोषित केले. याबाबत वडील रायबा सावंत यांनी पोलीस ठाण्यात माहिती दिली. पोलीस निरीक्षक विजय यादव व मसुरे पोलीस पथक घटनास्थळी दाखल झाले. मृतदेहाचे हिवाळे येथे शवविच्छेदन करण्यात आले. पूनम हिच्या पश्चात आई, वडील, दोन भाऊ असा परिवार आहे.
